အိပ်မက်လှလှမက်စေမယ့် နည်းလမ်းလေးတွေ
အိပ်မက်ကောင်းမက်ဖို့ လူတွေက လုံးဝထိန်းချုပ်မရတာတော့ မဟုတ်ပါဘူး။ ဒါပေမယ့် နည်းနည်းတော့ ခက်ခဲတာပေါ့။ ဘာကြောင့်လဲဆိုတော့ ဦးနှောက်က တွေးလိုက်တဲ့အရာတစ်ခု၊ ကိုယ့်ရဲ့ သိစိတ်နဲ့ မသိစိတ်ကိုတောင် သေချာထိန်းချုပ်နိုင်ခြင်းမရှိတဲ့အခါ အိပ်မက်လိုအရာမျိုးကို ကိုယ်လိုချင်သလို ကောင်းကောင်းမက်ဖို့ဆိုတာက နည်းနည်းတော့ ခက်ခဲနိုင်မှာပါ။ ခုပြောပြမယ့်အချက်တွေက ၁၀၀% အိပ်မက်ကောင်းမက်စေမယ်လို့ အာမခံထားတာမျိုးမဟုတ်ပေမဲ့ အိပ်မက်ဆိုးမမက်အောင်၊ အိပ်မက်လှလှလေး မက်နိုင်ခြေ ပိုများအောင်လို့တော့ ကူညီပေးနိုင်ပါတယ်။
၁။ ညအိပ်ချိန်ကို ပြည့်ဝအောင်အိပ်ပါ။
ညဘက်မှာ အရမ်းနောက်ကျမှ အိပ်တာမျိုးမဟုတ်ဘဲ ည ၉ - ၁၁ ကြားလောက်မှာ စအိပ်ပြီး ညအိပ်ချိန် အနည်းဆုံး ၇ နာရီလောက်အိပ်စက်အနားယူပေးမယ်ဆိုရင် အိပ်မက်လှလှလေး မက်နိုင်ခြေ ပိုများနိုင်ပါတယ်။ ကိုယ့်ရဲ့အိပ်ခန်းဟာ သင့်တော်တဲ့အခန်းအပူချိန်မှာ အသံလုံပြီး ဆိတ်ငြိမ်နေဖို့ လိုပါတယ်။ ညဘက်မှာ နှစ်နှစ်ခြိုက်ခြိုက်အိပ်ပျော်တဲ့သူတစ်ယောက်က အိပ်မက်လှလှမက်ဖို့ အခွင့်အလမ်း တော်တော်လေးများပါတယ်။
၂။ လေ့ကျင့်ခန်းလုပ်ပေးပါ။
လေ့ကျင့်ခန်းလုပ်ခြင်းဟာ လူတစ်ယောက်ရဲ့ ခန္ဓာကိုယ်က ကြွက်သားတွေတင်းမာတာကို ပြေလျော့စေပြီး အားအင်အများအပြား စိုက်ထုတ်လိုက်ရတာကြောင့် ညဘက်တွေမှာ ကောင်းစွာအိပ်ပျော်စေပြီး အိပ်မောကျသွားတဲ့အတွက် အိပ်မက်ကောင်းပိုမက်စေပါတယ်။ သတိထားရမှာက နေ့လယ်နေ့ခင်း ဒါမှမဟုတ် ညနေဘက်မှာ လေ့ကျင့်ခန်းအပြင်းအထန်လုပ်ပေးသင့်ပြီး ညအိပ်ချိန်နဲ့ အရမ်းကပ်နေပြီဆိုရင်တော့ ရိုးရိုးတန်းတန်း တရားထိုင်တာ၊ ယောဂကျင့်တာမျိုးပဲ လုပ်ပေးသင့်ပါတယ်။
၃။ ညအိပ်ကာနီးမှာ ရုပ်ရှင်ကြည့်တာမျိုး ရှောင်ပါ။
ဘာရယ်တော့မဟုတ်ပေမဲ့ ရုပ်ရှင်ကြည့်လို့ ဇာတ်ဝင်ခန်းတစ်ခုက ကိုယ့်အတွေးထဲစွဲသွားပြီဆိုရင် မသိစိတ်က ဒီဇာတ်ဝင်ခန်းနဲ့ ကိုယ့်တစ်နေ့တာမှာ ဖြစ်ခဲ့တဲ့ ပြဿနာ၊ ခံစားချက်တွေအားလုံးကို စုပေါင်းပြီး အိပ်မက်ဆိုးမက်အောင် လုပ်နိုင်ပါတယ်။ ဒါကြောင့် ညအိပ်ကာနီးမှာ ရုပ်ရှင်ကြည့်တာ၊ အွန်လိုင်းကြည့်တာ၊ Facebook သုံးတာမျိုး မလုပ်ဘဲ ပေါ့ပေါ့ပါးပါး လေ့ကျင့်ခန်းမျိုး လုပ်တာ၊ စာအုပ်ဖတ်တာမျိုးက ကောင်းစွာ အိပ်ပျော်နိုင်ဖို့နဲ့ အိပ်မက်ကောင်းမက်စေဖို့ ကူညီပေးနိုင်ပါတယ်။
၄။ စိတ်ဖိစီးမှုတွေကို လျှော့ချပါ။
ကျွန်တော်တို့ကို အိပ်မက်ဆိုးမက်စေတဲ့ အဓိကတရားခံဟာ စိတ်ဖိစီးမှုပါပဲ။ လူတွေဟာ နေ့စဉ်ဘဝမှာ စိတ်ညစ်စရာ၊ ပြဿနာပေါင်းစုံ ကြုံတွေ့နေရတာကြောင့် စိတ်ဖိစီးမှုဖြစ်တာ မဆန်းပေမဲ့ ဒီစိတ်ဖိစီးမှုကို မလျှော့ချဘဲ အိပ်ရာဝင်လိုက်ပြီဆိုရင် မသိစိတ်က ဒီခံစားချက်ကို အသုံးချပြီး အိပ်မက်ဆိုးတွေမက်အောင် ဖန်တီးနိုင်ပါတယ်။
ဒါကြောင့် ညမအိပ်ခင်မှာ စိတ်ဖိစီးမှုကို လျှော့ချဖို့ ရေနွေးနွေးနဲ့ ရေချိုးပေးတာ၊ တရားထိုင်တာ၊ စာအုပ်ဖတ်တာ၊ အမွှေးရနံ့ကုထုံးဖြင့် စိတ်ကို ပေါ့ပါးစေတာ၊ ယောဂကျင့်တာ၊ အသက်ရှူလေ့ကျင့်ခန်းတွေကို လုပ်ပေးနိုင်ပါတယ်။ ရှောင်ရမှာတွေကတော့ အလုပ်လုပ်တာ၊ ဒေါသထွက်တာ၊ အစာစားတာ၊ ဖုန်းကြည့်တာ၊ လေ့ကျင့်ခန်းအပြင်းအထန်လုပ်တာတွေကိုပဲ ဖြစ်ပါတယ်။
၅။ အိပ်နေတဲ့အနေအထားကို ပြောင်းကြည့်ပါ။
ဒီအချက်နဲ့ပတ်သက်ပြီး အတိအကျသတ်မှတ်လို့တော့ မရပါဘူး။ အကယ်လို့ ကိုယ်က အိပ်မက်ဆိုးမကြာခဏ မက်တတ်သူတစ်ယောက်ဆိုရင် နဂိုအိပ်နေကျအနေအထားနဲ့ မတူတဲ့ပုံစံနဲ့ စမ်းအိပ်ကြည့်ပါ။
၆။ မယ်လတိုနင်များတဲ့ အစားအစာတွေကို ပိုစားပေးပါ။
မယ်လတိုနင်ဆိုတာ ရောင်ခြယ်ဆဲလ်ဖြစ်ပြီး ခရမ်းလွန်ရောင်ခြည်ကြောင့် အသားအရေထိခိုက်ပျက်စီးမှုကို အဓိကကာကွယ်ပေးတဲ့ ဆဲလ်အဖြစ်လည်း လူသိများသလို၊ ကောင်းစွာအိပ်စက်အနားရစေနိုင်ဖို့လည်း ကူညီပေးနိုင်ပါတယ်။ ကြက်ဥ၊ ငါး၊ အသား၊ နွားနို့၊ အစေ့အဆန်၊ ဂျုံ၊ အခွံမာသီး၊ မှို စတဲ့ မယ်လတိုနင်ပါဝင်မှုများတဲ့ အစားအစာတွေကို ပိုစားပေးနိုင်ပါတယ်။ အစားအစာကနေမဟုတ်ဘဲ မယ်လတိုနင် အားဆေး၊ ဖြည့်စွက်စာတွေကိုလည်း သောက်သုံးနိုင်ပါတယ်။
၇။ အိပ်ချိန်ဇယားကို ပုံသေထားထားပါ။
ကိုယ်က နေ့စဉ်နေ့တိုင်း ပုံမှန်အိပ်ပေးနေတဲ့အခါ ဒီအချိန်ဇယားကို ဦးနှောက်က အသားကျသလို၊ ကောင်းစွာအိပ်ပျော်နိုင်စေတဲ့အတွက် အိပ်မက်လှလှမက်ဖို့ ဖြစ်နိုင်ခြေပိုများပါတယ်။
များသောအားဖြင့် ဒီအချက်တွေကို သေချာကြည့်မယ်ဆိုရင် ညဘက်မှာ ကောင်းစွာအိပ်စက်အနားယူခြင်းက လှပတဲ့အိပ်မက်တွေကို မက်နိုင်ခြေမြင့်တက်စေတဲ့ အဓိကသော့ချက်ပဲ ဖြစ်တာကြောင့် ကိုယ့်ရဲ့ညအိပ်ချိန်ကို သေချာဂရုစိုက်ဖို့ မှာလိုက်ပါရစေခင်ဗျာ။
ရေးသားသူ - ရဲမျိုးမြတ်